АҞӘА, жәабран 24 - Sputnik, Сариа Кәарцхьиаԥҳа. Жәларбжьаратәи аӡынтәи ашкол “Ашықәс арҵаҩы” Аҟәа иаатит жәабран 23 азы.
Аҵара аминистр Инал Габлиа Аԥсны арҵаҩцәеи Урыстәылатәи аусдырыҩцәеи аԥсшәа раҳәо иҳәеит:
“Агәахәара ду снаҭоит Аӡынтәи ашкол Аԥсны ҩынтәны иахьымҩаԥаҳго, Урыстәыла иреиӷьу арҵаҩцәа ахьаҳзаауа. Аамҭа иаҳнарбеит ари ашкол аҳәаақәа ирҭагӡаны ишәоуа адыррақәа нас апрактикаҿы ахархәара шроуа. Абри азы ҭабуп ҳәа шәасҳәоит" - иҳәеит иара.
II Жәларбжьаратәи аӡынтәи ашкол “Ашықәс арҵаҩы” аусура алагамҭаз абжьаратә школ №1 ашҭаҿы ҩ-ҵлак еиҭарҳаит. Инал Габлиа ас еиԥш ашьаҿақәа традициахап ҳәа дшақәгәыӷуа иҳәеит.
Жәларбжьаратәи аӡынтәи ашкол "Ашықәс арҵаҩы" ҩынтәуп Аԥсны имҩаԥысуеижьҭеи.
Сынтәа иара азкуп аҵаратә стереотипқәа риаара, аҵаратә усқәа рыӡбрақәа рызнеишьа, ашколхәыҷқәа рырҿиаратә лшарақәа реизырҳара рызҵаарақәа. Уи адагьы иазыԥхьагәаҭоуп аелектронтә рҵаратә ресурсқәа, ацифратә технологиақәа, агибридтә ҵара рыҭҵаара.