АҞӘА, хәажәкыра 10 – Sputnik, Асмаҭ Ҵәыџьԥҳа. Ахәыҷтәы студиа "Нарҭ" раԥхьаӡа акәны аспектакль "Брементәи амузыкантцәа" ахәаԥшцәа иднарбоит хәажәкыра 11-12 рзы ҳәа Sputnik иазеиҭеиҳәеит астудиа асахьаркыратә напхгаҩы Гәдиса Ҭодуа.
Иара иажәақәа рыла, асценаҿ иқәгылоит 6-17 шықәса зхыҵуа 17-ҩык ахәмарыҩцәа. Урҭ астудиаҿ рҽазыҟарҵоит рашәарамзаахыс.
Хәажәкыра 11 рзы иддырбоит апоетесса Гәында Сақаниаԥҳа аԥсшәахь еиҭалгаз аспектакль, хәажәкыра 12 рзы – урыс бызшәала. Арежиссиор-ақәыргылаҩ - Гәдиса Ҭодуа, ахореограф - Мрана Воуԥҳа.
Ахәыҷтәы театртә студиа "Нарҭ" Аԥсуа ҳәынҭқарратә драматә театр аҿы 2018 шықәса раахыс иаартуп. Астудиа ааӡамҭацәа раԥхьатәи рықәгылара мҩаԥысит 2018 шықәсазы аспектакль "Алабҷашь нашана" ала.