АҞӘА, хәажәкыра 10 - Sputnik. Аԥсны афымцамч ахархәара 18,7% илаҟәит жәабран 6 инаркны.
Аҳәынҭстандарт атехникатәи аенергетикатәи хылаԥшраз Аусбарҭа аиҳабы Ерик Кәакәасқьыр иажәақәа рыла, жәабран 6 рзы афымцалашара ахархәара 8,856 млн кВт⋅с ыҟазҭгьы хәажәкыра 9 рзы 7,193 млн кВт⋅с ыҟоуп.
Иара иазгәеиҭеит афымцамч ақәыӷәӷәара алаҟәра амш аҭагылазаашьеи амаинингқәа раԥырҟәҟәареи ишрыбзоуроу.
Ареспубликатә штаб аусура иалагеижьҭеи ауааԥсыра ирылгоуп 1796 маиниг хархәага.
Кәакәасқьыр иҳәеит амаининг хархәагақәы аҵыхәтәаны ишрылгаз жәабран 28 рзы.
Аҳәынҭстандарт аҵәахырҭаҿы 727 маининг шьҭоуп, АШәМ- 1069 маининг.