АҞӘА, хәажәкыра 12 - Sputnik. Аԥсны ашьапылампыл Афедерациа ахылаԥшра-леишәатә комитет "Нарҭ-Риҵа" реицыхәмарраан аӡбаҩ ииҿасыз ашьапылампыласҩы иганахьала аӡбамҭа аднакылеит, абри атәы аанацҳауеит Афедерациа апресс-маҵзура.
Гәдоуҭатәи "Риҵа" ашьапылампыласҩы Аинар Гамсаниа аԥҟарақәа реилагаразы иааидкыланы ҩышықәса, ахәмаррақәа быжьбеи рышҟа днашьҭхом. Иара азин имхуп Аԥсны ашьапылампыл Афедерациа еиҿнакаауа ахәмаррақәа рылахәхара.
Уи адагьы гәдоуҭатәи ашьапылампыласратә клуб "Риҵа" ахараԥса ақәҵан.
Аԥсны ашьапылампыл азы Ахраҿа хада агаразы гәдоуҭатәи "Риҵеи" аҟәатәи "Нарҭи" рыхәмарра мҩаԥысит аҳҭнықалақь астадион "Динамо" аҟны хәажәкыра 10 рзы. Ахәмарра 29 аминуҭ азы аӡбаҩ хада Касабиев ашьапылампыласҩы Аинар Гамсаниа иӷьеҩны ихәмарразы абӷьыц ҟаԥшь ииҭеит. Уи ашьҭахь Гамсаниа аӡбаҩ диҿасит.