АҞӘА, хәажәкыра 17– Sputnik, Бадраҟ Аҩӡба. Ашәҟәы "Аԥсны аԥареикәыршара аҭоурых" аҩбатәи аҭыжьымҭа ӡырган Аԥсны Абанк аҿы хәажәкыра 17 азы.
"Ашәҟәы актәи ахәта ҭыжьын 2018 шықәсазы, аха тираж маҷла, иара аиҳарак ҳамҭаны ирызшан. Ашәҟәы харҭәааны аиҭаҭыжьра аҭахны иҳаԥхьаӡеит Аԥсны Абанк амузеи аартра ашьҭахь. Араҟа ирацәоуп Аԥсны аԥареикәаршара иадҳәалоу аҭоурыхқәа, урҭ уажәтәи аҭыжьымҭаҿы иаарԥшуп", - иҳәеит Аԥсны Абанк амузеи адиректор, ашәҟәы авторцәа руаӡәк Асҭамыр Ҭаниа.
Иара иазгәеиҭеит амузеи аколлекциахь ишнанагаз иуникалу аԥараҿырп – араӡны иалху адрахмабжа, ҳера ҟалаанӡа III ашәышықәсазы иҭыжьу, абазелевс Аки ихьӡ анҵаны.
Ибрагим Чкадуа иҳәеит аҩбатәи аҭыжьымҭа раԥхьа иргыланы аԥшаах ҿыцқәа рыҟазаароуп мзызны иаиуз. Ҿырԥштәны иааигеит Тҟәарчалтәи арацәаҵхырҭа аус адуларазы ареволиуциа ҟалаанӡатәи хәызмоу ақьаадқәа ашәҟәы ранҵара.
"Аколлекционерцәа ҳаҽрымаадеит, дара сахьак ҳарҭеит, иара раԥхьаӡа акакәны иаҳкьыԥхьит. Уи адагьы аҭыжьымҭа ҿыц атираж еиҳа иҭбаауп, Аԥсны ауааԥсыреи асасцәеи иаархәартә аиԥш аҭагылазаашьа рымазаарц", - иҳәеит иара.
Ашәҟәы Ҭырқәтәыла иҭыжьуп, атираж 900 цыра ыҟоуп, аахәара алшоит Аԥсны Абанк амузеи аҿы аиԥш ареспубликатә шәҟәыҭирҭақәа рыҿгьы.