АҞӘА, хәажәкыра 18 - Sputnik. Аԥсны Аҩнуҵҟатәи аусқәа рминистрра аусзуҩцәа акриптовалиута арҳареи уи азы амаининг хархәагақәа атәыла ралагалареи рзы есыҽны мҩаԥырго агәаҭарақәа ирылҵшәаны хәажәкыра 10 инаркны 17 рҟынӡа 22 маининг хархәага рылыргеит. Абри атәы аанацҳауеит аусбарҭа апресс-маҵзура.
Пицунда ҩ-маининг хархәагак ԥшаан, Гәдоуҭа - жәба, Ҟәланырхәа ақыҭан - хәба. Очамчыра х-маининг хархәагак рылган, даҽа хԥа - Гал.
Иара убас адырраҭараҿ иаҳәоит, ААР агәрагагатә ҭелтә цәаҳәала изакәанымкәан акриптовалиута арҳаразы 67 ашшра шыҟаз. Уи иахәаԥшны иахәҭоу аусқәа рыдыркылеит. Аусбарҭа атәыла ауааԥсыра ҭабуп ҳәа рарҳәоит рграждантә ҭакԥхықәразы.