АҞӘА, хәажәкыра 29 - Sputnik. Аԥсныҟа раԥхьаӡа акәны аконтеинертә дәыӷба ааит ҳәа аанацҳауеит "Аԥсныеихамҩа" апресс-маҵзура.
62 контеинерла еибарку авагонеиԥшьра иаанагеит 2700 тонн аидара.
Аконтеинертә дәыӷбақәа рныҟәара аидеиа "Аԥсныеихамҩа" анапхгара ирызцәырҵит аидарамҩангара амҽхак аизҳара инадҳәаланы.
Ари авагонеиԥшьра аццакра 800-1000 километра инаӡоит уахыки-ҽнаки рыла. Ари ҩынтә еиҳауп аидарамҩангага дәыӷбақәа рыццакыра аасҭа. Уи адагьы, иарала еиҳа хкырацәала атауар аагара алшоит.
Уаанӡа "Аԥсныеихамҩа" апресс-конференциаҟны анаплакы анџьныр хада Леонид Ҟәыруа иҳәахьан ас еиԥш аидара амҩангара ахә 25-30% рыла ишеиҵахо.
Апроект анагӡаразы иалхын ари аус аҿы аԥышәа змоу хаҭалатәи аилахәыра. Иара ахахьы иагеит Очамчыра аконтеинертә терминал аргылареи иахәҭоу ала аиҿкаареи.