АҞӘА, мшаԥы 5 - Sputnik. Аԥсны акультура аминистр Даур Ақаҩба зхадараҿы дыҟоу аԥснытәи аделегациа идикылеит Аахыҵ Уаԥстәыла ахада Алан Гаглоев ҳәа аанацҳауеит Sputnik Аахыҵ Уаԥстәыла.
Аиԥылараҟны Гаглоев инаҵшьны иазгәеиҭеит аиашьаратә республикақәа ҩба рыжәларқәа рлахьынҵа шеидҳәалоу, еицырзеиԥшны аԥышәара дуқәа ишырхысыз, рҳәынҭқаррақәа разхаҵара ишазықәԥоз.
Даур Ақаҩба инаҵшьны иазгәеиҭеит Аԥсни Аахыҵ Уаԥстәылеи рыбжьара акультуратә еимадарақәа ԥхьаҟагьы рыҟазаара шхымԥадатәиу.
"Ҳара ҳзы акраҵанакуеит иахьа ҳаиашьаратә республикаҿы ҳахьыҟоу, ҳкультура ахәҭак акәзаргьы Аахыҵ Уаԥстәыла ажәлар иахьыдҳардыруа. Адунеи аҿы аҭагылазаашьа шыуадаҩугьы, аинырра аамҭа азаҳаԥшаауеит. Сгәы иаанагоит, арҭ ҩымш рыҩнуҵҟа Цхинвал имҩаԥысуа ауснагӡатәқәа агәахәара шәырҭап ҳәа", - иҳәеит иара.
Мшаԥы 5 рзы Цхинвал Аԥсуа культура амшқәа ирылагеит, ауснагӡатә хыркәшахоит мшаԥы 6 рзы. Арахь рҟазара ддырбарц иааит акәашареи ашәаҳәареи рзы Аҳәынҭқарратә ансамбль, Аԥснытәи аҿар ртеатр (аспектакль "Аибашьра ахԥатәи амш").