АҞӘА, мшаԥы 6 - Sputnik. Еицырдыруа аԥсуа спортсменцәа атәыла ахада Аслан Бжьаниа ииубилеи идырныҳәалеит. Абри атәы аанацҳауеит Аспорт азы аҳәынҭқарратә еилакы.
Дара атәыла ахада изеиӷьаршьеит агәабзиара, агәамч, агәалаҟазаара бзиа.
Адныҳәалара ҟарҵеит аолимпиатә чемпион Никита Симониан, ашьапылампыл азы адунеи ачемпионат аџьаз медал занашьоу Гьаргь Сыҷынаа, аҽтәы спорт азы СССР ԥшьынтә иачемпионхахьоу Харлам Шәманиа, аҽтәы спорт азы Зҽаԥсазтәыз аспорт азҟаза Наталиа Шәманиа, СССР ашьапылампыл ҩынтә иачемпионцәахахьоу Ахрик Цәеибеи Роман Ҳагбеи, автоеиԥхныҩлаҩ Дмитри Гәазаа, абоксиорцәа Харитон Агрба, Батал Чежьиа, Енвер Бзагәа, Аслан Бигәаа, аиқәԥаҩ Вальтер Барцыц, Аԥсны абокс азы Афедерациа аиҳабы Альберт Карди-оглы.
Аԥсны ахада ихьӡала адныҳәаларақәа аауеит шьыжьы аахыс. Аслан Бжьаниа ииубилеи идырныҳәалеит Владимир Путин, Алан Гаглоев, Валентина Матвиенко, Дмитри Медведев, ателехәаԥшратә дырраҭара амҩаԥгаҩ Владимир Соловев, Аԥсны аминистррақәеи аусбарҭақәеи рхадацәа уҳәа аӡәырҩы.