АҞӘА, мшаԥы 19 - Sputnik. Аԥсны Апарламент адепутатцәа Ахылаԥшратә палата ахантәаҩыс далырхит Каха Пертаиа.
Пертаиа изы рыбжьы арҭеит 34-ҩык адепутатцәа рҟынтәи 18-ҩык.
Иара убасгьы ари амаҵзуразы лкандидатура ықәгылан Кама Гогиаԥҳа.
Каха Пертаиа Апарламент афбатәи ааԥхьара депутатс дыҟан. Еиуеиԥшым ашықәсқәа рзы аус иуан: Очамчыратәи ААР аҟәша аусҭҵааҩ еиҳабыс, Очамчыра араион апрокуратура аусҭҵааҩыс, Тҟәарчал араион апрокурор ихаҭыԥуаҩыс, Гал араион апрокурорс.
2022 шықәса мшаԥымзы Апрокуратура хада Аусбарҭа аиҳабы инапынҵақәа неигӡон, 2022 шықәса лаҵарамзазы ихатәгәаԥхарала имаҵура аанижьуеит.
Аԥсны азакәанԥҵара инақәыршәаны Апалата ахантәаҩы дарҭоит, ма дамырхуеит Апарламент адепутатцәа. Иара изинмчра аҿҳәара хәышықәса ҳәа ишьақәыргылоуп. Хаҿык азин имам ҩ-ҿҳәарак инареиҳаны ари аҭыԥ аанкылара.