АҞӘА, мшаԥы 23 - Sputnik. Ниурнбергтәи апроцесс иазку ацәыргақәҵа Аҟәа иддырбоит Аиааира Амш аламҭалаз, иара убас имҩаԥысраны иҟоуп Аџьынџьтәылатә еибашьра Дуӡӡа иазку асахьаркыратә, адокументалтә, аҭоурыхтә фильмқәа дырбара, абри атәы аанацҳауеит Аԥсны иҟоу Урыстәыла ацҳаражәҳәарҭа.
Ацәыргақәҵа "Ниурнбергтәи апроцесс. Москвантәи агәаанагара" шьақәгылоуп атрибунал амҩаԥысшьа иазку хыԥхьаӡара рацәала афотосахьақәа, архивтә документқәа. Иара убас иҟалоит аҭоурыхҭҵааҩцәа ргәаанагарақәеи апроцесс зыла иабази уи иалахәызи ражәабжьқәа.
Аџьынџьтәылатә еибашьра Дуӡӡа иазку афильмқәа ддырбалоит мшаԥы 25 инаркны лаҵара 2 рҟынӡа Аҟәа Аибашьратә фырхаҵара ахьӡ-аԥша амузеи аҟны. Апрограмма аатуеит арежиссиор Николаи Лебедев исахьаркыратә фильм "Ниурнберг" ала.
Ацәыргақәҵа еиҿнакааит Александр Печиорски Ифонд, уи афонд хықәкыс иамоуп анацисттә концлагерқәа ирҿагылаз, маӡалатәи аусурақәа мҩаԥызгоз, анацистцәа ирабашьуаз, анемец оккупациа иахәхаз ауаа ргәалашәара анаунагӡатәра.