АҞӘА, лаҵара 2 – Sputnik. Асахьаҭыхыҩ Адгәыр Амԥар иусумҭақәа рцәыргақәҵа аатит Аҟәа Аԥсны асахьаҭыхыҩцәа рцәыргақәҵатә зал маҷ аҟны аҩаша, лаҵара 2 рзы.
"Адгәыр иусумҭақәа рцәыргақәҵа еснагь ҿыцрак аҵоуп, еснагь аинтерес аҵоуп. Иҟазара абзиабаҩцәа рзы еснагь даартуп", - лҳәеит ацәыргақәҵа иаҭааз бзиала шәаабеит ҳәа раҳәо Ацәыргақәҵатә зал хада аиҳабы Ельвира Арсалиаԥҳа.
Адгәыр Амԥар хаҭалатәи ицәыргақәҵа аартра идиныҳәалеит акультура аминистр Даур Ақаҩба.
Адгәыр Амԥар ацәыргақәҵа иаҭааз зегь ҭабуп ҳәа раҳәо иазгәеиҭеит, иусумҭақәа иҿыцу цәаныррақәак рзаанартып ҳәа агәыӷра шимоу.