АҞӘА, лаҵара 3 - Sputnik. Аԥсны имҩаԥгахоит Аахыҵ Уаԥстәыла акультура амшқәа лаҵара 30 инаркны рашәара 2-нӡа ҳәа аанацҳауеит акультура аминистрра апресс-маҵзура.
"Акультура амшқәа рымҩаԥгара - ари акыр зҵазкуа шьаҿоуп агуманитартә еиҿцәажәарақәа рырҭбаареи аҭынчра аиқәырхареи рзы", - ҳәа азгәеиҭеит Даур Ақаҩба, иҳәеит асеиԥш иҟоу аимадарақәа аиашьаратә жәларқәа ркультуреи, рҭоурыхи, рҵасқәеи иааигәаны абадырра ишацхраауа.
Аофициалла Акультура амшқәа аартхоит лаҵара 31 Самсон Ҷанба ихьӡ зху аԥсуа ҳәынҭқарратә драматә театр аҟны. Уаҟа идырбахоит Хетагуров ихьӡ зху аҳәынҭкарратә драматә театр аспектакль "Ауапа еиқәаҵәа".
Рашәара 1 азы аҳәынҭфилармониаҿ иқәгылоит Аахыҵ Уаԥстәылатәи аҳәынҭқарратә ансамбль "Симд".
Аусмҩаԥгатәқәа ирылагоит асааҭ 18:00 рзы, аҩналара хәыдаԥсадоуп.
Аԥсны акультура амшқәа Аахыҵ Уаԥстәыла мҩаԥган Цхинвал, 2023 шықәса мшаԥы 5-6 рзы. Ауснагӡатә алахәхаразы Аԥснынтәи Цхинвалҟа инеит Аԥсуа ҳәынҭқарратә аҿар ртеатр актиорцәеи Аҳәынҭқарратә ансамбль акәашаҩцәеи злахәу аделегациа. Аделегациа напхгара аиҭон Аԥсны акультура аминистр Даур Ақаҩба.