АҞӘА, лаҵара 15 – Sputnik. Аҟәатәи аҳаирбаӷәаза аусура ианалагалак ашьҭахь Гәылрыԥшь араион аҿы атуристцәа рхыԥхьаӡара акыр ишьҭыҵуеит ҳәа иҳәеит Аԥсны атуризм аминистр Ҭеимураз Хышба.
Атурсезон аламҭалаз аминистр ареспублика араионқәа дырҭаауеит.
"Гәылрыԥшь араион асасцәа аднаԥхьалартә аҭагылазаашьа амоуп. Ара амшын цқьоуп, аҭыԥқәа акыр иԥшӡоуп. Арҭ атуристцәа ргәы ззыҳәо ауп", - ҳәа иҳәеит Хышба араион ахада Саид Ҳаразиа иԥылараан.
Хышбеи Ҳаразиеи аҳаирбаӷәаза иаҭаан ирбеит, Гәылрыԥшь араион ахадара адгьылхархәареи архитектуреи рыҟәша аиҳабы Даур Шьоуа иацәажәеит.