АҞӘА, лаҵара 15 – Sputnik, Бадраҟ Аҩӡба. Аԥснытәи ашколхәыҷқәа "Артек" имҩаԥысуа аԥхьаҩцәа реицлабра "Зыԥсы ҭоу аклассика" афинал ахь инеит ҳәа аанацҳауеит Аԥсны иҟоу Россотрудничество ахаҭарнакра апресс-маҵзура.
Ажәабатәи акласс аҵаҩы Сабина Гогьиаԥҳа – Галтәи 2-тәи абжьаратә школ, афбатәи акласс аҵаҩы Софиа Ҳашԥҳа – Очамчыратәи 2-тәи абжьаратә школ.
"Ареспублика ашколхәыҷқәа имариамыз аԥышәарақәа ирхысит, адунеи еиуеиԥшым атәылақәа рҟынтәи изацлабуаз ириааины иреиӷьу аԥхьаҩ ихьӡ рҽаԥсартәырц азы "Зыԥсы ҭоу аклассика" афинал ахь инеиуеит лаҵара 18 рзы алагер "Морской" асценаҿ", - ҳәа аҳәоит апресс-маҵзура.
Ажиури рыӡбрала аицлабра афинал ахь инеиуеит 15-ҩык. Зынӡа "Артек" ахь инеит 255-ҩык аҵаҩцәа.
Алагер аҿы ашколхәыҷқәа аус рыдыруылоит атеатртә ҟазареи асценатә цәажәареи рырҵаҩцәа, афилологцәа, ажурналистцәа, аԥсихологцәа, иддырҵоит аблогинг, апластика.
Асезон аҟны иаиааиуеит хәҩык, рашәарамзазы афестиваль "Ашҭа ҟаԥшь" аҟны асуперфинал аҿы иқәгыло.