Аҵарашықәс ибзианы имҩаԥысит, аминистрра инанагӡараны иҟаз ахыдҵақәа зегьы нанагӡеит, урҭ Аиааира амш 30 шықәса ахыҵра иадҳәалан ҳәа азгәалҭеит Кәарҷелиаԥҳа арадиоефир аҿы.
Сынтәа ашкол иалгоит 1777-ҩык ахәыҷқәа. Ажәбатәи акласс аанрыжьуеит 200-ҩык раҟара. Убри аан медалла рҵара хдыркәшоит ԥшьҩык, урҭ рахьынтә аӡәы аԥсуа школ аҟынтә ҳәа адырра ҟалҵеит Кәарҷелиаԥҳа.
"Раԥхьаӡа акәны аиагаратә ԥышәарақәа рҿы иԥсахын аформат, урҭ тест ҳасабала иҟаҵан. Еиҳарак уи залагалаз ашколқәа рҿы абызшәазы аҭагылазаашьа зеиԥшроу аилкааразоуп", - ҳәа лҳәеит Кәарҷелиаԥҳа.
Убри аан иазгәалҭеит атестқәа шықәсык ахь ҩынтә аҟаҵара шрыгәҭаку.
Аԥсны аҵара аминистр ихаҭыԥуаҩ иара убасгьы еиҭалҳәеит арҵагатә шәыҟәқәа ҿыц еиҭаҭыжьыз ртәы.