АҞӘА, лаҵара 19 – Sputnik. Урыстәылатәи аԥшыхәцәа Аԥсны "адиверсантцәа" ржәылара аԥырҟәҟәаауа индырҵәеит, абри атәы аанацҳауеит Аладатәи арратә округ арратә база апресс-маҵзура.
Асценариа ала адиверсантцәа рҽазыршәон ахылаԥшра-аушьҭырҭатә ҭыԥ ақәлара, арратә хәҭа абазахь инеиразы. Аррамаҵзурауаа "аӷа" дҭадырхеит ахылаԥшра-аушьҭырҭатә ҭыԥ аҿы.
Аԥшыхәцәа иаԥырҵеит алҩатә ҭагылазаашьа, "аӷа" ихысырҭатә ҭыԥқәа ықәрыцҟьеит. Асапиорцәа ракәзар анџьныртә ԥшыхәра мҩаԥыргеит.
Атеррористҿагыларатә уснагӡатәқәа Аԥсны аҵакыраҿы имҩаԥыргоит Аладатәи арратә округ аррамаҵзурауаа аамҭа-аамҭала. Ари иалнаршоит разыҟаҵара аҩаӡара аизырҳара, еиуеиԥшым аҭагылазаашьақәа раан хра аманы рус анагӡара.