АҞӘА, лаҵара 25 - Sputnik. Аԥсны Санкт-Петербург имҩаԥысраны иҟоу афорум "Урыстәыла-Африка" иалахәхоит. Абри азы аҳәамҭа ҟаиҵеит Аԥсны АА рминистр Инал Арӡынба.
Иара иазгәеиҭеит Африка аус ацура Аԥсны азы аԥеиԥш змоу хырхарҭаны ишыҟоу.
"Урыстәылатәии белоруссиатәии ҳҩызцәа активла Африкеи дареи аус еицыруеит ахәаахәҭра-економикатә, аинвестициатә, агуманитартә уҳәа ахырхарҭақәа рыла. Ҳара, Аԥсны Аҳәынҭқарра аҳасабала Африкеи ҳареи ҳабжьара адиалог амҩаԥгаразы алшара ҳауеит", - иҳәеит аминистр.
Арӡынба африкатәи иҩызцәеи ипартниорцәеи ирыдиныҳәалеит лаҵара 25 азы иазгәарҭо Африка Амш.