АҞӘА, лаҵара 25 – Sputnik, Асмаҭ Ҵәыџьԥҳа. Аҟәатәи аолимпиатә ӡҭарчы рашәарамза алагамҭаз аартра азгәаҭоуп ҳәа арадио Sputnik иазеиҭеиҳәеит аилахәыра "Аквастрой" аиҳабы Олег Иурченко.
Иара иҳәеит ахыбра аусура аларгара амшқәа зеиԥшрахо ишадҳәалоу, аӡҭарчы аартра алшоит аӡы аԥхарра 23 градус ианыҟалалак, макьана 19 градус роуп иҟоу.
Иурченко иажәақәа рыла, сынтәа ара амҩахәасҭақәа алырдеит, асааҭ ықәдыргылеит, аӡҭарчы аҵа арыцқьаразы аробот-ԥссага аархәеит. "Аквастрой" адиректор дгәыӷуеит 2023 шықәсазы аҭааҩцәа ҵыԥх аасҭа еиҵахарым ҳәа.
Иара иҳәеит аҭааҩцәа рацәаҩхар аҟазааратә аамҭа ԥкхоит ҳәа.
Аҟәатәи аолимпиатә ӡҭарчы аартын 1980 шықәсазы, Москватәи аолимпиада аламҭалаз. Аԥсны жәлар Рџьынџьтәылатә еибашьраан ахыбра ааха аиуит, уи аахыс еиҭашьақәыргыламкәа иҟан.
Аҟәатәи аӡҭарчы 2007 шықәсазы ақалақь ахадара қьырала ЗҲәА "Аквастройинвест" ианаҭеит. Уи арҽеира-аиҭашьақәыргыларатә усурақәа ирылагеит. Абри аамҭа иалагӡаны ажәытә комплекс ықәган, адренажтә трубақәа шьҭаҵан, аӡыҭгагақәеи аӡрыцқьагақәеи ргылан, аҽыкәабарҭақәеи, аҽеилаҳәарҭақәеи, атрибунақәеи шьақәыргылан.
Аӡҭырчы аҵаулара – 2,25 метра, аҭбаара – 20 метра, аура – 50 метра иҟоуп. Иара 120-ҩык акуеит.