АҞӘА,лаҵара 30- Sputnik, Асмаҭ Ҵәыџьԥҳа. Аҟәа аоппозициа имҩаԥыргаз амитинг хыркәшоуп, абри азы аҳәамҭа ҟаиҵеит "Аԥсуа жәлар рхеидкыла" анапхгаҩы Адгәыр Арӡынба.
"Ҳхықәкы-ари амчра аҟнытәи аԥсуа жәлар рыхьчара ауп. Ари амш инаркны аоппозициатә мчқәа аҿагыларатә акциақәа мҩаԥаҳгалоит", - иҳәеит Арӡынба.
Адраматә театр аԥхьа еизаз ауаа аилыҵра иахыццакӡом. Иара убасгьы аҳәынҭқарра ахада идгылаҩцәа Иусбарҭа ашҭа аанрыжьӡом, Аслан Бжьаниа идәылҵра иазыԥшуп.
Уи аԥхьа аоппозициа алахәылацәа рмитинг аҿы алкаатә резолиуциа рыдыркылеит, уа дҵаны иҟарҵоит – аиҳабыра рыԥхьатәара. Аоппозициа рыдҵақәа рынагӡара атәыла ахада мап ацәикит.