АҞӘА, лаҵара 30 – Sputnik. Аԥснытәи аспортсменцәа ркоманда рхы аладырхәуеит аитәылауаа Адунеизегьтәи рыхәмаррақәа, абри атәы аанацҳауеит Россотрудничество Ахаҭарнакра.
Сынтәа Аԥсны ахьӡала иқәгылоит жәҩык. Дара еицлабуеит анапылампыли амҵәышәмпыли аспорт хкқәа рыла.
"Апрофессионалтә еицлабрақәа ахьымҩаԥыргало иреиӷьу аспорттә ҭыԥқәа рҿы шәықәгылоит. Ишәус хадаоу аиааироуп, шәыԥсадгьыл ҳаракыла аӡыргароуп. Аитәылауаа рыхәмаррақәа аспорттә еиндаҭлара адагьы шәдыррақәа зырҭбаауа усуп, аҩызцәа шәыԥшаауеит, дареи шәареи шәеинырлоит", - иҳәеит Россотрудничесво аконсультант Евгени Павлов.
Аҟәатәи анапылампыласҩы Данил Кәыҵниа Аԥсны ахьӡала ақәгылара алшара ахьимоу акыр деигәырӷьоит.
"Еилыскаауеит исыду аҭакԥхықәара. Исылшо ала схы аасырԥшуеит. Агәра згоит аҩызцәа ҿыццәа шсырҳауа. Даӷьесҭан акоманда алахәылацәа рабадырра сҭахуп", - иҳәоит ҳаспортсмен.
Аитәылауаа Адунеизегьтәи рыхәмаррақәа жәларбжьаратә спорттә еицлаброуп. Ахәмаррақәа мҩаԥыргоит аҳәаанырцә инхо аџьынџьуаа рыбжьара жәларбжьаратәи аспорттә, агуманитартә еимадарақәа, ахәыҷқәа реиҩызара аизырҳаразы, абаҩырҵәыреи аспорти радыԥхьаларазы.
Аиааира иазықәԥоит ԥшьышәҩык рҟынӡа спортсмен, 12 - 14 шықәса зхыҵуа, Аԥсны, Азербаиџьан, Мысра, Исландиа, Киргизиа, Кипр, Молдавиа, Шьамтәыла, Монголиа, Сербиа, Таџьикистан, Швециа, Аахыҵ Уаԥстәыла уҳәа атәылақәа рҟынтәи. Имҩаԥыргоит 2015 шықәса раахыс.
Аиҿкааҩцәа: Россотрудничество, Урыстәыла аспорт аминистрра, апартиа "Иаку Урыстәыла", Ашколтә спорт адунеизегьтәи афедерациа, Москва аспорт Адепартамент адгыларала.