АҞӘА, рашәара 1 - Sputnik, Бадраҟ Аҩӡба. С. Ҷанба ихьӡ зху аԥсуа драматә театр аҿаԥхьа имҩаԥысит Аҟәа ақалақь ахадара Акультура аусбарҭа еиҿнакааз Ахәыҷқәа рыхьчара амш иазкыз аконцерт.
Аконцерт иалахәын ахәыҷтәы акәашаратәи ашәаҳәаратәи коллективқәа.
Амшын аԥшаҳәаҟны иара убасгьы ицәырган ахәыҷқәа рҭыхымҭақәа.
Аныҳәа аҳра ауан Баграт Шьынқәба ихьӡ зху апарк аҟынгьы.
Араҟа ахәыҷқәа акатран аҟны асахьақәа ҭырхон, ашахмати ашашкеи ихәмаруан, асапын ашәаха аҟынтәи ампышҭақәа ҟарҵон, еиԥхныҩлон.
"Ари аныҳәа рыдысныҳәалоит ахәыҷқәеи урҭ рҭаацәеи, аныҳәа аиҿкааҩцәа ирылшеит ахәыҷқәа ргәалаҟазаара ашьҭыхра. Аригьы мшык ҳәа иҳаԥхьаӡап ахәыҷқәа ирҭаху ҟарҵартә аҭагылазаашьа анрымоу", - ҳәа лҳәеит хҩык ахәыҷқәа ран Изабелла.
Есышықәса адунеи аҟны рашәара 1 азы иазгәарҭоит Ахәыҷқәа рыхьчара жәларбжьаратәи амш.