АҞӘА, лаҵара 2 – Sputnik. 2023 шықәса хәымзтәи аихшьаалақәа рыла Аԥсны аԥхантәи аԥсшьараз заа иааныркыло аҭыԥқәа 27% еизҳаит ҵыԥх уажәааны иаҿырԥшны. Абри атәы арадио Sputnik иазеиҭеиҳәеит Урыстәыла Атуроператорцәа рассоциациа аиҳабы ихаҭыԥуаҩ Сергеи Ромашкин.
"Даара арбага бзиақәа ыҟоуп, рашәарамзазы зегь ҭииуп, асассирҭақәа рыҟны даара аҭыԥқәа маҷуп. Ԥхынгәыи- нанҳәамзеи рзы макьана аҭыԥқәа ыҟоуп, аха мызкы ашьҭахь аԥхантәи аҭыԥқәа зегь ҭины ҳалгоит", - ҳәа иҳәеит Ромашкин.
Ромшкин игәаанагарала, Урыстәылеи Қырҭтәылеи рыбжьара иаадыртыз аҳаиреимадара Аԥсныҟа аԥсшьаҩцәа раара зынӡагьы иаԥырхагам. Избанзар, Аԥсныҟа иаауа амшын азы даауеит.
Иара иазгәеиҭеит, Қырҭтәыла ашықәс нҵәаанӡа Урыстәылантәи 70-80-нызқьҩык рҟынӡа иаҭаауеит. Убри аан Аԥсны ашықәс нҵәаанӡа 1,5 миллионҩык атуристцәа шаҭаауа.