АҞӘА, рашәара 2 - Sputnik. Аԥсни Урыстәылатәи аихамҩақәеи аиқәшаҳаҭра рыбжьарҵоит аинырратә ҳақәа реиҭашьақәыргыларазы Аԥсны аҳәаа инаркны Гагранӡа, анаҩс Аҟәанӡагьы ҳәа "Апсны Иахьа" иазеиҭеиҳәеит "Аԥныеихамҩа" анџьныр хада Леонид Ҟәыруа.
"Аԥсни Урыстәылатәи аихамҩақәеи аиқәшаҳаҭра рыбжьарҵоит аинырратә ҳақәа реиҭашьақәыргыларазы. Мызкы аҩнуҵҟа иаараны иҟоуп аусуҩцәа ргәыԥ. Ари хымԥадатәуп ҳәа иазыршьеит афымцадәыӷба "Ласточка" аныҟәара аларгаразы", - иҳәеит Ҟәыруа.
Уи адагьы аихамҩахысырҭақәа ԥшьба ашлагбаумқәеи адырраҟаҵагақәеи рыла еиқәыршәахоит. Ахархәагақәа аахәоуп.
"Ари адәыӷбақәеи автомашьынақәеи рныҟәаразы ишәарҭадароуп. Иахәҭоу ахархәагақәа аахәоуп", - ҳәа иҳәеит Ҟәыруа.
"Аԥсныеихамҩа" ахарџьқәа рыла иаахәоуп амагистралтә локомотивқәа ҩба – аԥхаррахагаеи афымцахагеи, аҽа ҩ-локомотивк аахәахоит ашықәсбжа нҵәаанӡа.
"Аидарақәа рымҽхак аҭбаарахь ахшыҩҵак ыҟоуп. Уи азы алокомотивқәа рхыԥхьаӡарагьы иацҵатәуп. Уаанӡа иҳамаз аԥхаррахагақәа рыла 10-12 вагон ныҟәаагозар, иахьа амагистралтә ԥхаррахага иалшоит 50-60 вагон рныҟәгара", - иҳәеит иара.