АҞӘА, рашәара 5 - Sputnik. Ҟәланырхәа ақыҭаҿы адгьылҳәазара иахҟьаны ааха зауз аӡымҩангагатә цәаҳәа аремонт ҟарҵеит, абри атәы Sputnik акорреспондент изеиҭеиҳәеит Гәдоуҭа араион Аӡыршьҭра аиҳабы Оҭар Леиба.
"Адгьылҳәазара иахҟьаны ааха зауз аӡымҩангагатә цәаҳәа 150 метра ԥсахын. Иахьазы аӡыржәтә роуеит аӡы ахьыҟамыз Гәдоуҭа ахәҭак, иара убас Ҟәланырхәа ақыҭаҿ. Абӷархәықәаа аӡы роуеит уаҵәы ашьыжь", - иҳәеит иара.
Ҟәланырхәа ақыҭаҿы иҳаҩсыз амчыбжь азы аӡымҩангагатә цәаҳәа ааха аиуит адгьылҳәазара иахҟьаны. Ақыҭақәа Ҟәланырхәа, Абӷархықә, Гәдоуҭа ахәҭак руааԥсыра ӡыда иаанхеит.
Ӡыла аиқәыршәаразы апроблемақәа ыҟан ақалақь агәани Замостианка араион аҿи. Ақалақь ауааԥсыра арҭ амшқәа рзы аӡы роуан арезервтә ӡыҭгагатә станциа "Ааԥсҭа" аҟынтә.