АҞӘА, рашәара 7 - Sputnik. Аԥсны Агәабзиарахьчара аминистрра амедусбарҭақәа акурорттә аамҭа рҽазыҟарҵоит ҳәа арадио Sputnik аефир аҟны иҳәеит агәабзиарахьчара аминистрра ахәшәтәра-профилактикатә цхыраара аусбарҭа аиҳабы Баҭал Кациа.
Агәабзиарахьчара аминистрра акурорттә аамҭа аҽазыҟаҵара еиҳарак иаанаго, ахәшәтәырҭақәа русура арӷәӷәара, хәшәлеи амедусуцәеи рыла, иара убас атранспортла аиқәыршәара ауп. Сынтәа аԥсшьаҩцәа рацәаҩхараны иҟоуп, убри инамаданы ахәшәтәырҭақәагь ирыдҵаало рацәаҩхоит, еиҳарак мраҭашәаратәи араионқәеи Аҟәа ақалақь аҟни", - ҳәа иҳәеит Кациа.
Аԥхынтәи аамҭазы урыстәылатәи аҳақьымцәа амаҵураныҟәарыла Аԥсныҟа иаашьҭхоит. Уи азы агәабзиарахьчара аминистр Едуард Быҭәба Урыстәыла агәабзиарахьчара аминистр ихаҭыԥуаҩ Виктор Фисенко диацәажәахьеит. Зынӡа иаараны иҟоуп 15-ҩык аҟазацәа, еиҳарак ареспублика амедусҳәарҭақәа рыҟны ирҭаху - ареаниматологцәа, аинфекционистцәа, атерапевтцәа. Иара убасгьы иазгәаҭоуп аԥснытәи аҳақьымцәагь ргәыԥ еиҿкааны иаҳа иахьаҭаху ахәшәҭәырҭақәа рахь рышьҭра.
Даара ихадоуп хәшәла аиқәыршәарагь. Ахәшәтәра-профилактикатә цхыраараз, аусбарҭа аиҳабы иажәақәа рыла, араионтә хәшәтәырҭақәа иахәҭоу ахәшәқәа рыла еиқәдыршәоит аҭыԥантәи аиҳабыра, аха убри аан агәабзиарахьчара аминистрра џьара еизибамхарак ҟалар ацхыраара аҟаҵараз ихиоуп.
Аԥхынтәи аамҭазы ауаа еиҳарак ахәшәтәырҭақәа ирыдҵаалоит ахарахара, акьатеитә инфекциа, агәыхьчымазара, еиуеиԥшым ахәахәарақәа зоуз. Баҭал Кациа аҭыԥантәи ауааԥсыреи асасцәеи ирабжьеигоит амра рҽацәырхьчарц, аӡы рацәаны иржәларц, ауыҭраҭыхи ашәыри ӡәӡәаны ирфаларц, иара убас лассы-ласс рнапқәа рыӡәӡәаларц.
Аӡәы чмазарак ихьыр ихала иҽыхәшәтәра даламгакәан, иаразнак аҳақьымцәа дрыдҵааларц рабжьегоит аҳақьым. Кациа иажәақәа рыла, ахәшәтәырҭахь инеиуазаалак раԥхьатәи ацхыраара рыҭахоит, атуристцәа ирыцзароуп рхаҭара шьақәзаргыло ашәҟәқәа.