АҞӘА, рашәара 9 - Sputnik, Бадраҟ Аҩӡба. Ражден Гәымба ихьӡ зху Аԥснытәи аҳәынҭқарратә филармониаҿ ихыркәшахеит аклассикатә музыкатә фестиваль "Аконцертқәа рпарад".
Аконцерт иалахәын адирижиор Давид Терзиан напхгара зиҭо Аҳәынҭқарратә оркестор ззыхәмаруаз Аҟәатәи амузыкатә ҵараиурҭа аушьҭымҭацәеи аҵаҩцәеи.
Хыԥхьаӡара рацәала еизаз ахәаԥшцәа рҟазара ддырбеит - Соломон Ҳагба (афортепиано), Иарослав Бориаев (акларнет), Виачеслав Станкевич (аскрипка), Искуи Нагапетиан (афортепиано), Шахан Сиргинава (асаксофон), Мариа-Емилиа Терзиан-Ҳагба (аскрипка), Адам Габелиа (афортепиано), Лана Адлеиба (афортепиано).
Аҳәынҭқарратә филармониа асценаҟынтәи игон Мендельсон, Вебер, Моцарт, Шуман уҳәа егьырҭ акомпозиторцәа раԥҵамҭақәагьы.
"Апроект акырзхыҵуа аҭоурых амоуп, иара ҳаӡбеит 2010 шықәсазы, уи аахыс қәҿиарала еизҳауеит. Апроект аԥҵан Аԥсны акультура аминистрра, Чычба ихьӡ зху Аҟәатәи амузыкатә ҵараиурҭа аԥшьгарала - апроект автор, анапхгаҩы Аԥсны Жәлар рартистка Нинель Бжьаниа", - ҳәа азгәалҭеит Аԥсны зҽаԥсазтәыз акультура аусзуҩы Асида Царгәыш.
Лара илҳәеит, апроект аҳәаақәа ирҭагӡаны иазгәаҭоуп аклассикатә музыка ажанр аоркестри алахәылацәеи еицықәгылартә.
Илҳәеит апроект амҩаԥгара ианалагоз, аԥыжәара шрымаз апианинорҳәаҩцәа.
"Ҳара даара ҳаигәырӷьеит, раԥхьа арахәыцрҳәаҩцәа анцәырҵ. Уажәы гәахәарыла иазгәаҳҭоит урҭ ишрывагылаз егьырҭ аԥсыԥтә рҳәагақәа рынагӡаҩцәа ахьрыцлаз. Аригьы, хымԥада, ҳапроект аиааирақәеи ақәҿиарақәеи иреиуоуп", - лҳәеит Асида Царгәыш.