АҞӘА, рашәара 9 - Sputnik,Бадраҟ Аҩӡба. Аԥснытәи аоператә шәаҳәаҩы Саид Габечиа актәи аҭыԥ ааникылеит адирижиор Туллио Серафин ихьӡала афестиваль "Festival Vicenza in Lirica" аҳәаақәа ирҭагӡаны Италиа Виченца ақалақь аҟны имҩаԥысуаз аицлабраҿы.
"Аҳамҭа аҳасабала сара исоуит Моцерт иопера "Cosi fan tutte" ихадоу апартиақәа руак анагӡара. Цәыббрамзазы ари афестиваль ахь ааԥхьара сырҭеит, ашәа сҳәоит Виченца Олимпико атеатр аҟны", - ҳәа иҳәеит Габечиа, Sputnik аинтервиу аҭо.
Ашәаҳәаҩ иҳәеит ажиури аҟны ишыҟаз алԥшаара-адиректорцәа еиуеиԥшым атеатрқәа, еицырдыруа Ла Скала, Римтәи аопера уҳәа рҟынтәи. Иара убасгьы Габечиа ианаршьеит алԥшаара-адиректорцәа рҟынтәи Пуччинитәи афестиваль "Festival Pucciniano di Torre del Lago" аҳамҭа ҷыда.
"Ари афестиваль иабзоурахеит аконцерт аҟны аицлабра афинал аҟны инеиз даҽаӡәы лыцықәгылара", - ҳәа иҳәеит ашәаҳәаҩ.
Адирижиор Туллио Серафин ихьӡала имҩаԥысуаз аицлабра Италиа еиуеиԥшым ақалақьқәа рыҟны х-хәҭакны имҩаԥган, иара убас Тель-Авив аопераҟны. Алԥшааратә еицлабра ашьҭахь Виченца аҩбатәи атур мҩаԥган, афинал Олимпико атеатр аҟны.
"500 шықәса зхыҵуа атеатр даара аҵак ду амоуп, ахыбра иргылеит архитектор Палладио. Иара амфитеатр асахьа амоуп, сара сзын ижәҩангәашәԥхьаран иацы уаҟа ашәаҳәара", - ҳәа иҳәеит Гобечиа Sputnik акорреспондент ицәаныррақәа ицеиҩшо.
Моцерт иопера "Cosi fan tutte" аҟны Аԥснытәи аоператә шәаҳәаҩы Гульельмо ироль наигӡоит.