АҞӘА, рашәара 14 – Sputnik, Асмаҭ Ҵәыџьԥҳа. Зашәа аԥызҵо, иагьыназыгӡо ажәабатәи жәларбжьаратәи рфестиваль "Ашәа узысҳәоит, Аԥсынра!" мҩаԥысит И. Кәортуа ихьӡ зху Жәлар рҟазара ацентр аҟны ахаша, рашәара 14 рзы.
Афестиваль ачечен бард Имам Алимсултанов игәалашәара иазкын. Иара есышықәса имҩаԥысуеит ари ажанр ҳауаажәлар рыҩнуҵаҟа алаҵәара аиурц азы.
Афестиваль иалахәыз аԥсышәалеи урысбызшәалеи агитара ашәа ацырҳәеит, инарыгӡеит Аԥсны Аџьынџьтәылатә еибашьраан иҩыз ашәақәагьы.
Амузыкантцәа зегьы адипломқәеи агәалашәаратә ҳамҭақәеи ранашьан, иара убас алшара роуит зашәа аԥызҵо рклуб алахәхара.