АҞӘА, рашәара 14 – Sputnik. Аслан Бжьаниа Аҩнуҵҟатәи аусқәа рминистр ҿыц Роберт Киут аколлектив дыдирдырит.
Киут атәыла ахада иҭабуп ҳәа иеиҳәеит иҭоу агәрагаразы. Агәыӷрагь ааирԥшит аколлектив еидгыланы русура алҵшәа аиуп ҳәа.
"Аҩнуҵҟатәи аусқәа рминистрра аколлектив ибзианы издыруеит, изныкымкәан аусура аганахь ала ҳаиқәшәалон. Аусутә рацәоуп, ҳус ԥхьаҟа иацҵатәуп, иагьалҳаршароуп", - ҳәа иҳәеит Киут.
Вальтер Быҭәба аколлектив аус ицызуаз ҭабуп ҳәа раҳәо иазгәеиҭеит иара изын ишгәадураз аус рыцура.
"Агәра згоит аминистр ҿыц иаалырҟьаны, инарҵауланы дазымхәыцкәа азыӡбақәак идикыларым ҳәа. Сгәыӷуеит аҵыхәтәантәи хышықәса раахыс иазгәаҭоу ахырхарҭақәа ирыцҵаны аҿиара роуп ҳәа", - иҳәеит атәыла ахада.
Роберт Киут Аҩнуҵҟатәи аусқәа рминистрс дҟаҵоуп рашәара 13 рзы. Иара диԥсахит ԥхынҷкәынмза 2021 шықәса раахыс иҟаз Вальтер Быҭәба.