АҞӘА, рашәара 19 - Sputnik. Афымцадәыӷба "Ласточка" Шәача-Гагра ахырхарҭала аныҟәара еиҭахацыркхоит аҩаша, рашәара 20 инаркны ҳәа аҳәоит Урыстәыла аихамҩа асаит.
"Ласточка" ныҟәалоит иарбоу аамҭеихша инақәыршәаны. Апассаџьырцәа Шәачантәи Гаграҟа иаауа асааҭ 11:54 рзы амҩа иқәло Гагра иҟалоит асааҭ 15:00 рзы. Адәыӷба шьҭахьҟа игьежьуеит асааҭ 07:30 рзы.
Икьаҿу ахырхарҭала ибжьалоит даҽа ҩ-дәыӷбак - Гагра- Шәача аҳаирбаӷәаза.
Урҭ рнаҩсгьы, иарбац аамҭеихшала иныҟәалоит атуристтә ретро-дәыӷба "Сочи".
Рашәара 14 рзы иҟалаз амшцәгьа аихамҩа ианаҭаз аԥхасҭа иахҟьаны аамҭала иаанкылан афымцадәыӷбақәа "Ласточка" Гаграҟа рныҟәарақәа.
Рашәара 17 рзы "Аԥсныеихамҩа" аҟны ирҳәеит, ареспубликаҟны адәыӷбақәа русура шхацыркхаз. Аихамҩа ахәҭа ааха зоуз рыцқьаны еиҭашьақәыргылоуп.