Рашәара 19-25 рызтәи акультуратә хҭысқәа рафиша.
Сариа Кәарацхьиаԥҳа, Sputnik
Амчыбжь акультуратә хҭысқәа хацыркхоит Аԥсуа драматә театр аспектакль "Бернарда Альба лыҩны" ала. Иалагоит рашәара 20 асааҭ 19:00 рзы. Аспектакль ықәыргылоуп еицырдыруа аиспан драматург, апоет Федерико Гарсиа Лорка ипиеса ала, режиссиорс дамоуп Мадина Аргәын. Ақәыргыламҭа иаанарԥшуеит аиспан ҳәсақәа рыԥсҭазаашьа, зыԥшәма дыԥсыз Бернарда Альба рҭаацәаратә традициақәа инарықәыршәаны аа-шықәса ашәы ршәылҵоит лҭаацәа зегьы.
Рашәара 23 асааҭ 19:00 рзы идырбахоит "Агәхыхҩы". Аспектакль шьаҭас иамоуп Фиодор Достоевски иҩымҭа "Ауаа ӷарқәа", Макар Девушкини Варенка Добросиоловеи рыбзиабара. Ароль хадақәа нарыгӡоит - Аԥсны Зҽаԥсазтәыз артист Ҭеимураз Чамагәуеи актриса Амра Наҷҟьебиаԥҳаи.
Рашәара 21 асаат 19:00 рзы Аԥсуа ҿартә театр иқәныргылоит "Лхаҵкы аминистр иԥҳәыс", арежиссиор Есма Џьниаԥҳа. Ари акомедиа иаанырԥшуеит амали ачынуаҩреи рзы ауаҩы иԥсы шымҭәо.
Аԥснытәи аҳәынҭқарратә филармониаҟны аконцертқәа жәпакы рымҩаԥгара азгәаҭоуп.
Рашәара 20 асааҭ 19:00 рзы - Черим Нахушеви ансамбль "Кабардинка" рконцерт.
Рашәара 21 асааҭ 19:00 рзы - “ANATRIO”аконцерт аинструменталтә гәыԥ “APSNY-FOLK” алархәны.
Рашәара 24 рзы - ахәыҷтәы акәашаратә студиа "Иааирума" аихшьаалатә концерт.
Аҟәатәи ацәыргақәҵатә зал хадаҟны рашәара 22 инаркны 30-нӡа иаартуп асахьаҭыхыҩ Мариа Ԥлиаԥҳа хаҭалатәи лцәыргақәҵа.
Рашәара 25 асааҭ 17:00 рзы Пицундатәи ауахәамаҟны имҩаԥгахоит ауарӷан музыка "От классики до рок-хитов" аконцерт.