АҞӘА, рашәара 21 - Sputnik. Аԥсны иаадыртуеит Урыстәылатәи аҭоурыхтә еилазаара ахаҭарнакра, абри атәы аанацҳауеит Аԥсны ААР Амедиацентр.
Аԥснытәи ахаҭарнакра анапхгаҩыс дҟалоит ареспублика акультура аминистр иабжьгаҩ, Аԥсуаҭҵааратә институт аҭҵаарадырратә усзуҩ еиҵбы Милана Бжьаниа.
Урыстәылатәи аҭоурыхтә еилазаара азеиԥш еизара мҩаԥысит Москва рашәара 20 рзы. Уа ирыӡбеит аԥснытәи аҟәшеи Воронежтәи, Курсктәи, Томсктәи аобластқәа рҿы арегионалтә ҟәшақәа раартра. Уи адагьы, аилазаара анапхгара ахантәаҩы Руслан Гагкуев иҳәеит Аахыҵ Уаԥстәыла ахаҭарнакра аартразы азыҳәа шыҟоу.
Урыстәылатәи аҭоурыхтә еилазаара аадыртит 1866 шықәса рзы Санкт-Петербург, 1917 шықәсазы иҟалаз ареволиуциа ашьҭахь уи аусура аанкылан. Ауаажәларра аусура еиҭалагеит 2012 шықәса рзы, уи аахыс иара ахантәаҩыс дыҟоуп Адәынтәи аԥшыхәра амаҵзура аиҳабы Сергеи Нарышкин.