АҞӘА, рашәара 23 - Sputnik. Урыстәылатәи аруаа УАМ рџьаԥҳанышьҭаҵарҭақәа еилаԥырххаит. Абри атәы аанацҳауеит Урыстәыла атәылахьчара аминистрра.
Урыстәыла Арбџьармчқәа икылкаан ихысуа абџьар ала ахарантәи иԥыржәеит УАМ рџьаԥҳанышьҭаҵарҭақәа. Ахықәкы нагӡан. Иарбаз ахыбра еилаԥыххан",- аҳәоит адырраҭараҿы.
Аусбарҭа адыррақәа рыла, украинатәи аруаа уахыки-ҽнаки рыла Алада-Донецки, Запорожиеи, Донецки рхырхарҭақәа рахь ажәыларазы аҽазышәарақәа ҟарҵон.
Уахыки-ҽнаки рыла УАМ иацәыӡит 130-ҩык ауаа, атанкқәа хәба, аибашьыгатә машьынақәа хԥа, амашьынақәа ԥшьба, агаубицақәа Д-20 ҩба, ахаланыҟәагатә артиллериатә шьақәгыла "Krab".
Донецктәи ахырхарҭаҟны иаԥырҟәҟәаан аӷа ижәыларақәа ԥшьба, украинатәи аибашьцәа 90-ҩык ҭархан, акәылӡымашьынақәа ҩба, апикапқәа хԥа, агаубицақәа Д-20, "Мста-Б", аџьаԥҳанышьҭаҵарҭа.
Купиантәи ахырхарҭаҟны уахыки-ҽнаки рыла украинатәи аибашьцәа 30-ҩык ҭархоуп, акәылӡымашьынақәа ҩба, амашьынақәа хԥа, ахаланыҟәагатә артиллериатә шьақәгыла "Krab", ажәылара-ԥшыхәратә гәыԥқәа ҩба русура еиԥырҟьан.
Красно- Лимантәи ахырхарҭаҟны ажәылара-ԥшыхәратә гәыԥ аусура еиԥырҟьан, украинатәи аибашьцәа 90-ҩык ҭархан, аибашьыгатә машьынақәа ҩба, акәылӡымашьынақәа ҩба, апикапқәа ҩба, агаубицақәа Д-20, "Мста-Б", ахаланыҟәагатә артиллериатә шьақәгыла "Гвоздика".
Херсонтәи ахырхарҭаҟны иҭархан 40-ҩык аӷацәа, амашьынақәа ԥшьба.
Аоператив-тактикатә авиациеи, аракетатә ари, артиллериеи ааха рырҭеит 93 артиллериатә ҟәша, ауааԥсыра, аибашьыга техника 102 раион рҿы.
Урыстәыла Аҳауаҽацәыхьчаратә хархәагақәа аицҭырҟьаратә система HIMARS 15 реактивтә хгәыцә, аԥырҩы дызҭам 11 хархәага карыжьит.