АҞӘА, рашәара 24 - Sputnik. Аӡиудо азы XV жәларбжьаратәи аицлабрақәа "Аԥсны Ахраҿа" хыркәшан рашәара 25 рзы, абри атәы лҳәеит аицлабрақәа рмаӡаныҟәгаҩ хада Ирена Адлеиаԥҳа.
Атурнир алҵшәақәа рыла аԥсуа спортсменцәа 13 медал иаиааит: ахьы-ҩба, араӡны-хәба, аџьаз-фба.
"Зегь маншәаланы имҩаԥысит, атурнир иалахәыз зегьы ргәалаҟазаара бзиоуп. Аицлабрақәа ацәанырра ӷәӷәа рыҵан", - лҳәеит Адлеиԥҳа.
Аԥсны араионқәа, Урыстәылеи Белоруссиеи рықалақьқәа рҟынтәи 320-ҩык аспортсменцәа злахәыз аӡиудо азы жәларбжьаратәи аицлабрақәа мҩаԥысуан Аҟәа, рашәара 22 - 24 рзы.
Аӡиудо азы "Аԥсны Ахраҿа" аицлабрақәа рҟны аԥсуа спортсменцәа 13 медал иаиааит
© Foto / Ирэна Адлейба
Рашәара 22 рзы еицлабуан 2007-2009, 2010-2011 шш. рзы ииз, рашәара 23 рзы - 2012-2013 шш. рзы ииз, рашәара 24 рзы - 2015 шықәсазы ииз арԥарцәа, иара убас 2007-2009 шш., 2011-2012 шш. рзы ииз аҭыԥҳацәа.
Атурнир еиҿкаан Аԥсны аҿари аспорти русқәа рзы Аҳәынҭқарратә еилакы, Аҟәа ақалақь аҿари аспорти русқәа рзы аусбарҭа, Аԥсны асамбои аӡиудои рзы Афедерациа рыдгыларала. 15 шықәса раахыс аицлабра аспонсор хада - "Амра-банк".