АҞӘА, рашәара 25 - Sputnik, Сариа Кәарацхьелиаԥҳа. Гәдоуҭа араион ашкол аушьҭымҭацәа рыхәылԥаз мҩаԥыргеит амҽыша, рашәара 25 рзы.
Ахәылԥаз алагамҭаз, араион аиҳабыреи ауаажәларреи ашәҭ шьыҵәрақәа шьҭарҵеит Аԥсны Аџьынџьтәылатә еибашьраан иҭахаз аибашьцәа рбаҟа амҵан.
Анаҩс аушьҭымҭацәа еишьҭагылан ақалақь амҩаду хада ианысны "Гәыда Ута" апаркахь инеит, уаҟа ирзыԥшын аконцерттә программа.
Аԥсны Аҵара аминистр ихаҭыԥуаҩ Ада Кәарҷелиаԥҳа ашкол аушьҭымҭацәа зегьы ирыдылныҳәалеит.
"Шәара аԥсҭазаара ду амҩа шәанылеит. Ҳара агәра ганы ҳаҟоуп, шәара зегьы иаԥсоу ҵеицәан шәшышьақәгылаз, шәдыррақәа шеихашәҳауа. Шәаԥхьаҟа аманшәалара шәзеиӷьасшьоит, агәра ганы сыҟоуп шәаԥхьаҟа аԥепш бзиа шшәоуа. Мҩамш", - ирзеиӷьалшьеит Кәарҷелиаԥҳа.
Аушьҭымҭацәа рыхәылԥаз хадырҭәааит аԥсуа естрадатә шәаҳәаҩцәеи акәашаратә нсамбльқәеи.
2023 шықәсазы Гәдоуҭа араион аҟны 245-ҩык аушьҭымҭацәа ыҟоуп. Урҭ рахьынтәи 11-ҩык рҵара бзиаӡаны ихдыркәшеит. Зҽалызкааз иранашьан ашәҟәқәа. Иааидкыланы 2023 шықәсазы Аԥсны ашколқәа рыҟны 1777-ҩык рҵара хдыркәшеит.