АҞӘА, рашәара 29 - Sputnik. Аԥсны Аминистрцәа реилазаара аӡбрала Аԥсны аҩнуҵҟеи уи анҭыҵи ауааԥсыра рыхәшәтәразы иазоужьу аԥара иазырҳауп, абри атәы аанацҳауеит Аминистрцәа реилазаара апресс-маҵзура.
Апрограмма аԥаразоужьра мҩаԥысуеит ареспубликатә биуџьет аҟынтә, уи аҽа 30 миллион мааҭ ацҵаны 120 миллион рҟынӡа инагоуп.
Иара убасгьы ишьҭыхуп ахәшәқәа раахәареи урҭ амедицинатә усбарҭақәа рыҭареи рзы аԥаразоужьра.
Апрограмма ахықәкқәа иреиуоуп- ачымазцәа ргәабзиара аиӷьтәразы ацхыраара рыҭара, рымч-рылша аиқәырхаразы, ахәыҷқәа рыԥсҭазаара алҵра армаҷра.
Агәабзиарахьчара аминистр Едуарда Быҭәба иажәақәа рыла, ҵыԥх апрограммала ареспублика анҭыҵ ҽыхәшәтәра ирышьҭит 1300-ҩык.