АҞӘА, рашәара 29 - Sputnik. Аԥсны агәабзиарахьчара аминистр Едуард Быҭәбеи Урыстәыла агәабзиарахьчара аминистр актәи ихаҭыԥуаҩ Виктор Фисенкои агәабзиарахьчара аусхк аҟны азакәанԥҵара аишьашәалара азҵаарақәа ирылацәажәеит. Абри атәы аанацҳауеит аусбарҭа апресс-маҵзура.
"Едуард Быҭәбеи Виктор Фисенкои алацәажәеит Аԥсны Аҳәынҭқарра азакәан "Агәабзиарахьчарази" Урыстәыла Афедералтә закәан "Урыстәылатәи Афедерациа аҟны атәылауаа ргәабзиара ахьчара хадақәа рзи" рыбжьара аконцептуалтә еиҿагыларақәа рызҵаарақәа", - аҳәоит адырраҭараҿы.
Иара убасгьы аганқәа ирзааҭгылеит ауааԥсыра ирырҭо амедмаҵзурақәа рхаҭабзиареи ателемедицина аҿиареи.