АҞӘА, рашәара 29 - Sputnik. Урыстәыла Аҳәынҭқарратә дума ҩ-тәылауаҩрак аиуразы Аԥсни Урыстәылеи рыбжьара Аиқәшаҳаҭра шьақәнарӷәӷәеит ҳәа аанацҳауеит РИА Новости.
"2022 шықәса цәыббра 27 рзы Москва анапы зҵаҩу Урыстәылатәи Афедерациеи Аԥсны Аҳәынҭқарреи рыбжьара ҩ-тәылауаҩрак аиуразы Аиқәшаҳаҭра шьақәырӷәӷәазааит", - аҳәоит азакәан апроект аҿы.
Уаанӡа Аԥсны Жәлар Реизара ҩ-тәылауаҩрак аиуразы Аԥсни Урыстәылеи рыбжьара Аиқәшаҳаҭра шьақәнарӷәӷәеит ԥхынҷкәынмза 30 2022 шықәсазы. Аиқәшаҳаҭра аҳәаақәа ирҭагӡаны иазԥхьагәаҭоуп: аҩ-ҳәынҭқаррак – Урыстәылеи Аԥсни ртәылауаа рзинтә статус аҭышәныртәалара, иара убасгьы ареспублика атәылауаа Урыстәыла атәылауаҩра ирмарианы роура.
2008 шықәсазы Урыстәыла Аԥсны ахьыԥшымра аназханаҵа ашьҭахь ҩ-тәылауаҩрак роураз аиқәшаҳаҭра ахьыҟамыз иахҟьаны урыстәылатәи атәылауаҩшәҟәқәа Аԥсны атәылауаа ирмарианы рыҭара аанкылахеит.
Аиқәшаҳаҭра инақәыршәаны нанҳәа 26, 2008 шықәсанӡа Урыстәыла атәылауаҩра змаз, абри аамҭазы иара зцәымӡыз, зықәра наӡоу Аԥсны атәылауаа урыстәылатәи атәылауаҩра ирмарианы аиуразы арзаҳал рҩыр алшоит.
Ари аҩыза аиқәшаҳаҭра Урыстәылеи Таџьиикистани, Урыстәылеи Туркменистани ирыбжьоуп.