АҞӘА, рашәара 30 – Sputnik. Акруизтә лаинер "Князь Владимир" раԥхьатәи акоммерциатә реис мҩаԥнагеит.
Аӷба 82 турист аанагеит. Дара Аԥсны аҳҭнықалақь аҿы иҟазаауеит хымш. "Князь Владимир" абаӷәаза ааннажьуеит амҽыша ахәылбыҽха.
Аӷба аԥыларазы абаӷәазахь днеит атәыла ахада Аслан Бжьаниа. Иара иазгәеиҭеит аӷба апассаџьырцәа ҳаҭырла ишырԥылатәу.
Аӷба аԥыларазы абаӷәазахь днеит атәыла ахада Аслан Бжьаниа
© Sputnik / Томас Тхайцук
"Ари ҳара ҳполитикоуп, атәыла анапхгара рполитикоуп. Аԥыжәара аҳҭоит. Ԥсшьара иаҳҭаауа ргәалаҟазаара ашьҭыхра ҳҽазаҳшәозароуп", - иҳәеит ахада.
"Амшынеиқәатә круизқәа" рдиректор хада Александр Ткаченко иазгәеиҭеит аӷба аԥсныҟа амҩа ианықәлоз аиҿкааратә зҵаарақәа зегьы рҭыԥ ишықәҵаз, аԥсуа ҳазалхыҩцәа ракәзар апассаџьырцәа урыстәылатәи амаҵзура аусуҩцәа раасҭагьы хырыҩ шрырҭо.