АҞӘА, ԥхынгәы 1 - Sputnik. Аԥсны ахада Аслан Бжьаниа Урыстәыла ахада Владимир Путин ааԥхьара ииҭеит Аиааиреи Ахьыԥшымреи 30 шықәса ахыҵреи ахьыԥшымра жәларбжьаратәи азхаҵара 15 шықәса ахыҵреи ирызку аныҳәатә усмҩаԥгатәқәа аҽалархәразы. Абри атәы аанацҳауеит атәыла ахада ипресс-маҵзура.
Уаанӡа Кремль апресс маҵзура иаанацҳахьан, Владимир Путин ҭелла Аслан Бжьаниа дышиацәажәаз атәы. Аԥсны ахада гәыҩбарада азакәанреи аконституциатә леишәеи рышьақәыргылара иазку Урыстәылатәи Афедерациа анапхгара имҩаԥнаго аусмҩаԥгатәқәа адгылара шриҭо атәы иҳәеит.
Аганқәа алацәажәеит акыр хра злоу ҩ-ганктәи амшхәаԥштә аҟны иқәгылоу азҵаарақәа, Аԥсны асоциал-економикатә ҿиаразы иазгәаҭоу ауснагӡатәқәа налаҵаны.