АҞӘА, ԥхынгәы 3 – Sputnik, Асмаҭ Ҵәыџьԥҳа. Гәдоуҭеи Гагреи аплиажқәа ахараԥса рыдырҵеит аӡҭаларатә сезон азтәи аԥҟарақәа ирықәшәо иахьыҟамыз азы ҳәа Sputnik иазеиҭеиҳәеит зышәагаа маҷу аӷбақәа рзы аинспекциатә маҵзура аиҳабы Ҭенгиз Сабуа.
Иара иажәақәа рыла, игәаҭаны ирхысит Афон, Гагра, Пицунда, Цандрыԥшь рыплиажқәа. Урҭ рҟынтәи асезон иазырхиаз Афонтәи аплиаж амацара акәын. Рыдҵақәа ахьынармыгӡаз азы араионқәа рхадацәа ахараԥсақәа рықәҵан – 12 000 мааҭ.
Сабуа иҳәеит аӡҭаларатә сезон аламҭалаз аӡаҵақәа шрыцқьатәу, аԥкыратә дыргақәа шықәыргылатәу, аиқәырхагатә станциақәа шаарттәу, аӡҭалара азин ҟазҵо ма иҟазымҵо арбагақәа аҭахуп ҳәа.
Сабуа иҳәеит Гәдоуҭа ахадараҿы агәра шидыргаз иаарласны амшынҵа шыдрыцқьо, аӡҳәаарбагақәа амшын ишхырҵо.
"Егьырҭ аҭыԥқәа рҿы лассы еилгарак ҟалап ҳәа сыҟам. Аҭагылазаашьа аҭыԥ ишықәырҵо азы ажәа ҳарҭеит, аха сақәгәыӷцәом", - иҳәеит иара, иагьазгәеиҭеит агәаҭарақәа рылкаақәа рзы Аԥсны АҶА аминистр адырра шиҭоу.
Ҩымчыбжьа рышьҭахь аинспекциа аҟазауаа арҭ аилагарақәа ахьазгәаҭаз аҭыԥқәа еиҭарҭаауеит.