АҞӘА, ԥхынгәы 5 - Sputnik. Аԥсны аҩнуҵҟатәи аусқәа рминистр Роберт Киути Урыстәыла Аҩнуҵҟатәи аусқәа рминистр ихаҭыԥуаҩ Игор Зубови еиԥылеит Москва. Абри атәы аанацҳауеит Аԥсны ААР апресс-маҵзура.
Аганқәа злацәажәаз азҵаарақәа иреиуоуп:
2021-2023 шықәсқәа рзы аминистррақәа русеицуразы Апрограмма анагӡара;
Аҩнуҵҟатәи аусқәа русбарҭақәа еицырзеиԥшу аинформациа-ҳәаақәызҵо ацентр ахыбра Аҟәа аргылара;
аҳәаахьчара иахьаҵанакуа изакәанымкәан анаркотикатә маҭәашьарқәа реикәыршареи ацәгьоуреи рҿагылара;
аусеилыргареи аусӡбареи иацәыбналаз ауаа рыԥшаара;
акурорт аамҭазы урыстәылатәи аԥсшьаҩцәа ршәарҭадара аԥҵара.
Роберт Киути Игор Зубови ишьақәдырӷәӷәеит Аԥсни Урыстәылеи рыҩнуҵҟатәи аусқәа рминистррақәа русеицура арӷәӷәара ишазхиоу.