АҞӘА, ԥхынгәы 6 – Sputnik. Ашьхахыҵырҭа Пыв аҿы 1942-1943 шықәсқәа рзы ара иҭахаз асовет еибашьцәа рбаҟа аиҭашьақәыргылара иалагеит.
Аусурақәа мҩаԥыргоит акультуратә фонд "Платформа" аԥшьгаратә гәыԥ Приволжие иҟоу Аԥсны аҳаҭыр консул Владимир Литвинчук идгыларала.
"Акультура аминистрраҟны азин ганы ҳара азыҟаҵаратә усурақәа ҳрылагеит, аха аамҭақәак рышьҭахь еилкаахеит абаҟа еилаҳар шалшоз. Аӡынра ара илеиуа асы иахҟьаны аметалл жьакцеит. Иҳаӡбеит абаҟа ҳарҿыцырц, аха убри аан ажәытәтәи аҟынтә ахьӡҩырақәа азынҳажьырц, уи алагьы аимадара ааҳарԥшырц", - ҳәа иҳәеит афонд анагӡаратә директор Дмитри Статеинов.
Абаҟа ахьгылоу аҭыԥ атуристцәа рацәаҩны иаҭаауеит.
Статеинов иҳәеит еиҵагыло абиԥарақәа рзы аҭоурыхтә гәалашәара шеиқәырхатәу.
"Иахьа, Европеи асовет ҳәынҭқарра иалаз тәылақәаки рҿы асовет еибашьцәа рбаҟақәа ықәыргоит. Ҳара ара, Аԥсны, иааҳарԥшуеит афашизм иаиааиз асовет жәлар, асовет солдаҭцәа рфырхаҵара аҳаҭыр шақәаҳҵо, ишаҳхамшҭуа" - иҳәеит Статеинов.