АҞӘА, ԥхынгәы 6 – Sputnik, Сариа Кәарацхьиаԥҳа. "Сергеи Багаԥшь игәалашәаразы" XII Жәларбжьаратәи ахацәа ркомандақәа рыбжьара амҵәышәмпыл азы аицлабра хыркәшахеит аԥшьаша, ԥхынгәы 6 рзы.
Актәи аҭыԥ аннакылеит Краснодартәи атәылаҿацә аҟынтәи акоманда "Гулькевичи", аҩбатәи – Черкесск, ахԥатәи – Аҟәа.
Аицлабраҟны иреиӷьу ахәмарҩцәа ҳәы рыхьӡқәа рҳәеит Георги Гориаинов (Шахты), Саид Матуа (Аҟәа), Александр Нахимов (Черкесск), Никита Ремезов акоманда "Гулькевичи" ахәмарҩы .
XII Жәларбжьаратәи аицлабра аатит амҽыша, ԥхынгәы 2 рзы Аҟәа. Аицлабра иалахәын жәа-командак ЛЖәр, ДЖәР, Ҟарачы-Черкесск, Волгоград рҟынтәи акомандақәа иара убас Ростовтәи аоблости, Краснодартәи атәылаҿацәи, Аԥсни рҟынтәи ҩба-ҩба команда.
Аицлабраҟны аӡбаҩ хадас дыҟан Алада Урыстәыла Аолимпиатә академиа аиҳабы актәи ихаҭыԥуаҩ, РСФСР-и Аԥсни зҽаԥсазтәыз азыҟаҵаҩ, "Ахьӡ-Аԥша" III аҩаӡара занашьоу Александр Банников.
Аицлабрақәа еиҿыркааит Аԥсны аҿари аспорти русқәа рзы Аҳәынҭеилаки Аԥсны амҵәышәымпыл азы Афедерациеи амобилтә еилахәыра "А-мобайл" ацхыраарала.