АҞӘА, ԥхынгәы 10 - Sputnik. Урыстәыла ахада Владимир Путин Урыстәылеи Аԥсни рыбжьара ҩ-тәылауаҩрак аиуразы аиқәшаҳаҭра шьақәзырӷәӷәо афедералтә закәан инапы аҵеиҩит.
Аиқәышаҳаҭраҿы ишарбоу ала, аиқәшаҳаҭра аганқәа руак атәылауаҩ азин имоуп итәылауаҩра мап ацәымккәа егьи аган атәылауаҩра иоур.
Аиқәшаҳаҭра инақәыршәаны нанҳәа 26 2008 шықәсанӡа Урыстәыла атәылауаҩра змаз, абри аамҭазы иара зцәымӡыз, зықәра наӡоу Аԥсны атәылауаа урыстәылатәи атәылауаҩра ирмарианы аиуразы арзаҳал рҩыр алшоит.
Имариоу аформала Урыстәыла атәылауаҩра аиушьа аусмҩаԥгатә уи иаҵанакуа акатегориақәеи иазырхиатәны иҟоу адокументқәа реиқәыԥхьаӡеи ҳәаақәҵахоит Урыстәыла ахада хаз игоу иӡбрала.
14 шықәса рҟынӡа зхымҵыц ахәыҷқәа рҭаацәа ртәылауаҩра роуеит, убри аан ахәыҷы атәылауаҩра имамкәан даанымхароуп. Убри аан аҭаацәа ртәылауаҩра аҽаԥсахуазаргьы ма аҭаацәа рзин рымырхуазаргьы иара ахәыҷы итәылауаҩра аҽаԥсахӡом.
Ҩ-ҳәынҭқаррак ртәылауаҩра змоу ауаа иааиԥмырҟьаӡакәа иахьынхо аҳәынҭқарра азакәанԥҵара инақәыршәаны асоциалтәи амедицинатәи амаҵзурақәа, аҵарадырра роур рылшоит.
Арра зхызгар зыхәҭоу, ҩ-тәылауаҩрак змоу аррамаҵзура иахысроуп иааиԥмырҟьаӡакәа иахьынхо атәылаҿы. Егьи атәылаҿы дара аррамаҵзура ахысраҟынтә рхы иақәиҭтәуп.