АҞӘА, ԥхынгәы 11 – Sputnik. Амшцәгьақәа ирхырҟьаны Аԥсныҟа атурқәа мап рыцәкразы аӡәгьы аҭел даҳзасуам, аныҟәарақәагьы аԥырхуам ҳәа РИА Новости иазеиҭеиҳәеит Урыстәыла Атуроператорцәа рассоциациа (АТОР) ахада ихаҭыԥуаҩ Сергеи Ромашкин.
"Аҭелгьы уаҩ даҳзасуам, атурқәагьы мап рцәыркуам. Ҳтуристцәа амшцәгьа краамҭа инхом ҳәа ирыԥхьаӡоит. Ииашаҵәҟьаны, Шәача ма Аԥсны амшцәгьа мышкы-ҩымш иреиҳахаӡом", - ҳәа иҳәеит Ромашкин.
Иара иазгәеиҭеит урыстәылатәи туристцәақәак амшцәгьа ашьҭахь аӡы зҵалаз асасааирҭақәа рҟынтәи даҽаџьара ишиаргаз, зыԥсшьараамҭа нҵәаз ракәзар, Шәачатәи аҳаирбаӷәазахь ишнагаз амашьына дуқәа рыла.
АТОР ахада ихаҭыԥуаҩ агәыӷра ааирԥшит зыԥсшьараамҭа хацзыркуа атуристцәа маншәаланы рҭыԥқәа рахь инеип ҳәа.
Аԥсны амшцәгьа ҟалеит ԥхынгәы 9 рзы, ихыҵит аӡқәа, ааха роуит аҩнқәа, амҩақәа. Иҟоуп ӡыдеи фымцалашарадеи иахьаанхазгьы.