АҞӘА, ԥхынгәы 13 – Sputnik. Ԥхынгәы 9-12 рзы, адәыӷбақәа рныҟәара ахьынӡаԥкыз атрансфер аиҿкаарала 4 585-ҩык рҭыԥ ахь инаган ҳәа аанацҳауеит Атуризм аминистрра.
Ауаа рымҩангара мҩаԥыргон "Аԥсны аихамҩақәеи" амилаҭтә туреилахәыра "Туристи".
"Амилаҭтә туристтә еилахәыра ԥхынгәы 9 - 12 рзы 59 реис мҩаԥнагеит. Автобусқәа быжьба 2500-ҩык ауаа мҩаныргеит", – иҳәеит Ҭеимураз Хышба.
Хышба иҳәеит, Атуризм аминистрреи "Аԥсныеихамҩеи" уаанӡагьы аусеицурақәа шымҩаԥыргахьаз. Рашәарамзазы, амшцәгьа ареспубликатә мҩадуи аихамҩеи аԥхасҭа рнаҭеит, адәыӷбақәа рныҟәара нкылан. Усҟан адәыӷбақәа "Аҟәа-Москва", "Санкт-Петербург-Аҟәа" рпассаџьырцәа рзы еиҿкаан атрансфер.