АҞӘА, ԥхынгәы 14 - Sputnik, Бадраҟ Аҩӡба. Алитература, аҟазара, архитектура русхк аҟны Дырмит Гәлиа ихьӡ зху Аҳәынҭқарратә премиа аиура зылшо рыхьӡқәа ҳәоуп. Абри азы Sputnik адырра анаҭеит Аԥсны акультура аминистрра.
Арахь иаҵанакуеит: Мадина Аргәынԥҳа лықәыргыламҭа аспектакль "Сариа", Инна Аҳашԥҳа лажәеинраалақәа реизга "Аԥсыраӡа", афильмқәа "Зураб Ачба", "Атеррор ду. Ҩарданаа рхылҵшьҭра алахьынҵа", "Аслан Оҭырба", "Ауахҭа", "Аԥсны адоуҳа" – Асҭанда Қьецԥҳаа, асахьаҭыхыҩ Нугзар Логәуа ирҿиамҭақәа, "Аԥсуа реквием" – Нодар Ҷанба, Шебзухова Лариса Рушьбеи Смыр ипоема "Семра" абаза бызшәахь аиҭага.
Иаиааиз рыхьӡқәа рылаҳәахоит 2023 шықәса анҵәамҭаз.
Алитература, аҟазара, архитектура русхк аҟны Дырмит Гәлиа ихьӡ зху Аҳәынҭқарратә премиа аиуразы аицлабра рылаҳәан сынтәа, хәажәкырамзазы. Акомиссиахь азыҳәақәа рыдыркылон рашәара 1 аҟынӡа. Аԥхьахә рыҭахар алшоит 2020-2022 шықәсқәа рзы иҭыжьыз арҿиамҭақәа.
Дырмит Гәлиа ихьӡ зху Аҳәынҭқарратә премиа шьаҭаркын 1967 шықәсазы. Раԥхьатәи алауреатцәа - Баграт Шьынқәба, Иван Папасқьыр.