АҞӘА, ԥхынгәы 24 – Sputnik, Бадри Есиава. Ҩымчыбжь рыҩнуҵҟа Гәдоуҭа аротавирус рыдырбалеит 300-ҩык ахәыҷқәа ҳәа адырра ҟалҵеит есымчыбжьа араион ахадараҿ имҩаԥырго аилацәажәараҟны араион асанитар ҳақьым хада Инга Ҷанԥҳа.
"Бжьаратәла есыҽны 30-30-ҩык Гәдоуҭа ахәышәтәырҭақәа рахь идҵаалоит ԥхынгәымза азбжаахыс аротавирус рыманы. Реиҳараҩык асасааирҭа "Россиа" аҟны зыԥсы зшьо роуп. Ари еиҳарак изыхҟьо Урыстәыла ари ачымазараз алаҵа ҟарҵаӡом, ҳара ҳхәыҷқәа алаҵа рзыҟарҵоит. Уи адагьы, аҭыԥантәи ахәыҷқәа уиаҟара амшын иҭалаӡом", - лҳәеит лара.
Ҷанԥҳа иазгәалҭеит ичмазцәоу зегьы ахәыҷқәа шракәу. Ачымазара аҟазшьақәа – адатра, аҿыхра. Ахәышәтәырҭахь идҵаалаз рҟынтә зҭагылазаашьа уадаҩыз дыҟам. Ахәыҷқәа иахәҭоу апроцедурақәа ирыхрыжьуеит, анаҩс рыҩныҟа ма раангыларҭахь иоурыжьуеит.